Adin txikikoentzako programa bat bertan behera, begirale batek positibo eman ostean

Galdakaoko Udalak bertan behera utzi du adinez txikiak direnentzako programa bat, begiraletako batek koronabirusean positibo eman eta gero.

Horren ondorioz, Santi Brouard Plazako harmailen azpiko lokala itxi egin dute, bertan udalak kontratatutako enpresa batek adingabeekin lan egiten du. Mozoilo Irratiak jakin izan duenez, «zerbitzu presentziala eten egin da, baina telefonoz zerbitzua eskainiko da».

Begirale horrekin egon diren bi familiei jarraipena egiten ari zaie, udaleko iturriek Mozoilo Irratiari helarazi diotenez.

Era berean, udalak kontratatutako enpresak egoeraren berri eman dio Osakidetzari eta bere esku dagoen informazioa helarazi dio.

Azkenik, udalak bizilagunei gogorarazi die «arreta handiz» jokatu behar dutela eta beharrezko neurriak hartu behar dituztela koronabirusaz ez kutsatzeko.