Bakartxo Tejeria berretsi dute Legebiltzarreko lehendakari

Ezkerretik eskuinera: Iturrate, Prieto, Tejeria, Blanco eta Angulo. Argazkia: Iñaki Iriondo Twitterren (@gara_iiriondo)

Barkartxo Tejeria (EAJ) aukeratu dute berriz, gehiengo osoz, Eusko Legebiltzarreko lehendakari, Voxeko Amaia Martinezen aurkako bozketa irabazi ostean. 41 legebiltzarkideek (EAJ eta PSE-EE) Tejeriaren alde bozkatu dute; Amaia Martinezek boto bat lortu du (Vox), eta 33 hautetsiek zuriz bozkatu dute (EH Bildu, Elkarrekin Podemos eta PP+C’s).

Behin Legebiltzarreko mahaiko lehendakari hautatuta, lehendakariordeak aukeratu dituzte. Alderdi Sozialistako Txarli Prieto izango da lehen lehendakariordea (41 boto) eta EH Bilduko Eba Blanco bigarren lehendakariordea (21 boto).

Iñigo Iturratea (EAJ) eta Gustavo Angulo (Elkarrekin Podemos) izango dira Legebiltzarreko mahaiko bi idazkariak, 37 eta 11 boto lortuta, hurrenez hurren.

Hortaz, Eusko Alderdi Jeltzaleak bi kide izango ditu Legebiltzarreko mahaian (Presidentetza eta Lehenengo idazkaritza); eta EH Bilduk, Alderdi Sozialistak eta Elkarrekin Podemosek kide bana izango dute (Bigarren lehendakariordetza, Lehenengo lehendakariordetza eta Bigarren idazkaritza, hurrenez hurren).

Mahaia eratu baino lehenago, adineko mahaia osatu dute adinez legebiltzar zaharrenek eta gazteenek, EAJko Jose Antonio Suso presidente izanda. Susok minutu bateko isilunea egiteko deia egin du, COVID-19ak utzitako hildakoen omenez.