Hiru herritarrek eramango dute Korrikaren lekukoa Udalaren kilometroan eta zozketa bidez erabakiko da nortzuk

Galdakaoko Udala | Martxoaren 14tik 24ra izango da euskararen aldeko 23. Korrika, Irundik Baionara. Tarte horretan Euskal Herri osoan zehar egingo duen ibilbidean, Galdakaora martxoaren 21ean iritsiko da, ostegun eguerdiz. Erletxetik 11:55ean sartu, eta Euskal Herriko udalerri gazteenera egingo du jarraian, Usansolora. Ondoren helduko da Galdakao erdigunera, 12:30 inguruan, gero Bengoetxe eta Aperribai aldera egiteko.

Udaletxe ondoko kilometroa Galdakaoko Udalak erosi du; 1.780. kilometroa, Ardantza parke ondotik Gipuzkoa kaleko 11. zenbakira artekoa. Herritarrek eramango dute lekukoa tarte horretan, herria herritarrek egiten baitute eta Udala herriaren ordezkari besterik ez baita. Hortaz, Korrikaren lekukoa Galdakaoren izenean eraman nahi dutenen artean zozketa egingo du Udalak eta horrela aukeratuko da zeintzuk izango diren 1.780. kilometroan lekukoa eramango duten hiru herritarrak.

Zozketan parte hartu nahi duten galdakoztarrek astelehenetik igandera bitartean izango dute izena emateko aukera, martxoaren 4tik 10era, Udalaren webgunean, https://www.galdakao.eus/23korrika/ loturan. Udalak hurrengo astean jakinaraziko du nortzuk diren bere izenean Korrikaren testigua eramango duten pertsona horiek.