Udalak Erabaki Galdakao herritarren partaidetzarako plataformaren erabilera zabaldu eta horretan trebatzeko kanpaina abiarazi du

2022ko otsailean, Galdakaoko Udalak Erabaki Galdakao herritarren partaidetzarako plataforma abiarazi zuen Decidim plataformak eskainitako teknologia librean oinarrituta, Udalak irekitako prozesu eta espazioetan parte hartzeko aukera erraztearren, proposamenak landuz edo babestuz, eztabaidetan parte hartuz edo gure auzo edo herriari dagozkion gaiei buruz bozkatuz. Eta hori guztia, klik bakar batean.

Plataforma hau (erabaki.galdakao.eus) beste partaidetza-modu batzuk osatzen dituen tresna da, digitalaren eta presentzialaren arteko hibridazioa sustatuz. Ez dago plataforman baino erabil ez daitekeen partaidetzarako kanalik, izan ere, baliokide presentziala izango dute une oro, plataforma erabili nahi ez duenarentzat edo plataforma erabiltzen ez dakienarentzat. Hala ere, xedea plataformaren erabilera sustatzea da, horretaz baliatzeko tresnak eta gaitasunak dituzten pertsonen artean. Gainera, plataformak prozesuen trazabilitatea egiteko aukera ematen du, partaidetza-prozesuak nola egin diren, partaidetza-organoek nola funtzionatzen duten eta nortzuek osatzen dituzten, edota Udalak bereganatutako konpromisoen betetze-maila zein den jakitea erraztuz.

Dagoeneko 2.000 pertsona inguru erregistratu dira erabaki.gadakao.eus plataforman, baina Galdakaoko Udalak kanpaina bat abiarazi du herriko biztanleen artean ezagutzera emateko, erabilera sustatzeko eta horretarako trebakuntza bultzatzeko.

Abian diren ekintzen artean, beren-beregi nabarmen daitezke plataformaren oinarrizko funtzionamendua azaltzeko zenbait bideoren elaborazioa eta adinekoekin, elkarteekin, gazteekin eta beste talde batzuekin antolatutako prestakuntza eta trebakuntza saioak. Laster, beste prestakuntza-saio batzuk egingo dira, eta ohiko kanalen bitartez jakinaraziko da.
Gainera, stand ibiltaria prestatu da Galdakaoko herritarrentzat, plataforma erabili nahi dutenei laguntza eta informazioa emateko asmoz, bai erregistratu eta egiaztatzeko prozesuan, bai irekita dauden prozesuetan parte hartu ahal izateko, betiere gai horretan aditutako pertsonen eta laguntzaz eta aholkularitzaz eta beharrezko ekipo informatikoen bitartez. Stand hau herriko leku ikusgarri eta jendetsuetan kokatuko da, eta informazio-liburuxkez gain, QR kode handi bat ere izango du, gailu mugikor batetik plataformara zuzenean sartu ahal izateko. Standa bi lekutan jarriko da ondorengo egunetan:

• Agirre Lehendakariaren Plazako arkupeetan, bertako produktuen merkatuarekin bat eginez – Otsailaren 8, 15 eta 22an, 17:30etik 19:30era bitartean
• Iturrondo plazan, larunbatetako merkatu txikiarekin bat eginez – Otsailaren 10 eta 17an, 12:00etatik 13:30era bitartean

Galdakaoko Udalak herritarrak animatu nahi ditu erabaki.galdakao.eus plataforman profila ireki eta parte har dezaten, eta zailtasunen bat izanez gero, aipatutako standera edo udaletxera hurbildu eta prozesu osorako laguntza lortzeko aukera izango dutela gogoratu du. Plataformako bertako Laguntza atalean ere arazorik izatekotan nora jo behar den azalduta dago.