Galdakaoko kirol zentroetan erabiltzeko deskontu-bonuak salgai egongo dira datorren astelehenetik aurrera

Galdakaoko Udalak, Gu Dendari merkatari elkartearekin elkarlanean, berriro jarriko du martxan ‘Bono Kirola’ kanpaina, herritarren artean bizimodu osasungarria sustatzeko helburuarekin. Kanpaina honen bidez, galdakoztarrek 20 euroko balioa duten bonuak erosi ahal izango dituzte 10 euroan, udalerriko kirol zentroetan eta gimnasioetan erabiltzeko.

Datorren astelehenetik aurrera, martxoaren 3an, abiatuko da ‘Kirola aitzakirik gabe’ izeneko kanpaina berria, eta 10.000 bonu eskainiko dira guztira. Horrek 100.000 euroko aurrezkia ekarriko die erabiltzaileei. Pertsona bakoitzak, gehienez, 12 bonu eskuratu ahal izango ditu urtean, 120 euroko deskontua lortuz. Hala ere, hilabete bakoitzeko kuotarako bonu bakarra erabili ahal izango da, ezin izango baitira hilabete berean bonu gehiago metatu.

Nola eskuratu bonuak

Bonuak martxoaren 3ko 09:00etatik aurrera eskuratu ahal izango dira Udalaren webgunean, bonuak agortu arte. 65 urtetik gorakoentzat, aurrez aurre erosteko aukera eskainiko da Gu Dendariren bulegoan, Muguru plazan, 09:00etatik 14:00etara. Bonuak martxoaren 31ra arte erabili ahal izango dira ordainbide gisa, eta kreditu-txartelarekin bakarrik ordaindu ahal izango dira.

Kirolaren eta ekonomia lokalaren sustapena

Kanpainaren helburu nagusia herritarren artean kirola egiteko ohitura sustatzea bada ere, ekimen honek udalerriko kirol zentroak ere indartzen ditu. Galdakaok hainbat jarduera egiteko azpiegitura egokiak eskaintzen ditu, bai kirol premia pertsonalak bai kolektiboak asetzeko.

Horregatik, Galdakaoko Udalak herritar guztiak animatzen ditu kanpainan parte hartzera, aktibo mantendu, osasuna hobetu eta kirolaren onurak bizitzeko aukera izan dezaten.