Kaserna talde galdakoztarra Rockeineko finalean arituko da larunbatean

Datorren larunbatean, azaroak 19, izango da Rockeinen 10. edizioko finala, Basauriko Social Antzokian, eta bertan izango da Kaserna talde galdakoztarra.

Jaialdiaren 10. edizioko sari nagusia irabazteko hautagaiak hiru dira: Arde Marte Ezkerraldeko pop eta elektronika bikotea, Saray Dacostak eta Sergio Juarrosek osatua; Ginger punk-rock laukote zarautztarra; eta Silitia bikote bizkaitar gaztea, 60ko hamarkadako rock mistikoaren eta pop jostagarrienaren erreminiszentziekin.

Beste hiru talde finalistek tokiko artista onenaren saria lortzeko aukera izango dute: Kaserna, 2020an Mr Pongo taldearen errautsetatik jaio zena Galdakao eta Arrigorriagako kideekin;  Erein, hasiera batean Izaro edo Olatz Salvador bezalako artistek eraginda 2021ean sortutako laukotea, Basauriko eta Arrigorriagako kideekin; eta Pelícanos, duela bi urte Basaurin eta Etxebarrin sortutako beste talde berri bat, Juanito Makandé, M Clan edo Fito & Fitipaldisen eraginekin.

Gainera, Arde Martek eta Gingerrek Eskarabilera saria jasotzeko aukera izango dute, eta Ereinek eta Gingerrek, ostera, Euskarazko Artistarik Onenari saria.

Finala larunbatean izango da, sarrera doakoa izango da eta publikoa zutik egongo da.

Ohi bezala, Rockeineko 4 kategorien irabazleen izenak (Artistarik onena euskaraz eta Eskarabilera saria, barne) finalean bertan jakinaraziko ditu epaimahaiak. Lehiaketa Basauriko Udalak antolatzen du, Galdakao, Arrigorriaga eta Laudioko udalen eta Bizkaiko Foru Aldundiaren laguntzarekin, eta Hego Euskal Herriko bakarlari eta taldeei zuzenduta dago. Aurtengo lehiaketarako 188 artistak eman dute izena, zazpigarren urtez jarraian parte hartze marka gaindituz.