Gora Santakurtzak!

Irailak 11 ditu gaur, barikua da. Birus madarikatu hau gure artean ez balego, Santakurtzak hasiko lirateke. Arrastiko zazpiak aldera, musika bandak lagunduta, koadrilla guztiek euren desfilea egin eta gero, denak udaletxeko balkoiari so egongo ginateke. 

Duela urtebete balkoi horretan egoteko aukera eta ohorea izan nuen; herriak irratiagatik egin zuena eskertzeko ordua izan zen momentu hori, gaur mezu berdina helaraziko genuke, baina ezin ahaztu birusak eraman dituen galdakoztar guztiak; bihoakie haiei eta euren senitartekoei besarkadarik beroena. 

Horren ostean festa lehertuko litzateke, koadrila bakoitzak bere kolorea soinean, batzuek berdea, besteek urdina eta albokoek gorria; eta zapi berdea samatik jarrita ondo pasatzeko astea hasiko litzateke. 

Berdea, urdina, gorria… koadrila guztiek ostadarra osatzen dute herrian, denak elkarrekin bat eginez. Eta elkarrengandik bereizita egon behar dugun honetan, inoiz baino elkartuago egongo gara, ostadarra margotzen. 

Bizi dugun egoerak ez digu uzten jaiak ospatzen, baina horrek ez du esan gura ondo pasatzerik ez daukagunik, jantzi dezagun saman zapi berdea, eta ondo pasa dezagun! Hori bai, zentzuz eta arduraz. Eta “batzuen farra ez dadila beste batzuen agurra izan”.

Datorren urtean, dena ondo bidean, jaiak ospatuko ditugu eta orduan egongo da aukera dantza egiteko, ozen abesteko, elkarri besarkadak emateko… ondo pasatzeko. 

Gora Santakurtzak! Gora Galdakao! Eta gora Galdakaoko jende polita!