Denak du muga bat

Leioako campusean tiroketa gertatu zela mundu guztiak daki honezkero. Ustezko tirotzailearen zenbait datu ere bai, zoritxarrez. Hedabide hainbat dago horren atzean, tartean gure inguruan gehien irakurtzen den egunkaria eta telebista publikoa.

Ilustrazioak, jazoerarekin zerikusirik ez daukaten datuak, eta sare sozialetan irakurritakoaren arabera, izen-abizenak ere bai datu horien artean. Morboa azken batean, eta txarrena beharbada, herritarrek gehien kontsumitzen dutena. Kazetari moduan bete beharreko lehenengo printzipioetako bat biktimen eta dena delakoen intimitatea babestea da, are gehiago balizko gaixotasun mental baten aurrean egon gintezkeenean. 

Putreak balira moduan, kazetari (kazetariak edo) horiek bilatzen dutena oso argi uzten dute tankera honetako jazoerek: negozioa egitea, dirua azken finean. Baina denak ez du balio dirua lortzeko, denak du muga bat. Kazetariak izan aurretik pertsonak gara, gutxieneko etika batekin (beharko genuke behintzat) eta printzipio batzuk errespetatzen ez baditugu akabo kazetaritza eta akabo gizatasuna.

Kazetaritzak, benetazko eta kalitatezko kazetaritzak, luzaroan iraun dezan, egin dezagun denon artean kazetaritza hobeago bat. Adeitasunez, kazetari kume batek, atzetik datozenei.