Igandean Arrigorriagako 2022ko Herri Krosa egingo da

Arrigorriagako Udala | Aurtengoa lasterketaren XXI. edizioa izango da eta osasun arrazoiak direla eta, banakako irteerak izango dituen proba bakarra egitea erabaki dute antolatzaileek.

Datorren igandean, otsailaren 27an, Arrigorriagako XXI. Herri krosa antolatu da; hori bai, formatu txikian.

Osasun-egoera dela eta, eta jende pilaketak saihesteko, antolatzaileek 9,5 kilometroko proba bakarra egitea erabaki dute, haurren eta helduentzako proba laburrak bertan behera utzita. Lasterketa 11:00etan hasiko da kiroldegian eta irteerak banakakoak izango dira jende pilaketak saihesteko. Ibilbidea ohikoa izango da: harrobietako errepidetik Zaratamora joango da eta Arrigorriagara itzuliko da.

Gainera, aurreko urteetan egin bezala, antolakuntzak elikagaiak bilduko ditu Tindufeko Saharako errefuxiatuen kanpamenduetara bidaltzeko, izaera solidarioa galdu gabe. Elikagaiak, dortsalekin batera, kiroldegiko irteeran (eta helmugan) jasoko dira.

Lasterketak 300 parte-hartzailerentzako lekua du eta izen-ematea doakoa da, Urbiko Triatloi Taldearen webgunearen bidez egin daiteke (www.urbikotriatlon.com).