Marta Perea galdakoztarrak Athleticen jarraituko du

Marta Pereak eta talde zuri-gorriak akordioa lortuta, erdilari galdakoztarrak Athleticek jarraituko du beste denboraldi batez, 2021eako ekainera arte. Hori horrela, zazpi denboraldi emango ditu Lezaman.

2011. urtean Lezamako harrobira heldu zen, eta 2014ean debutatu zuen lehen taldean. Hurrengo urteetan, lehen eta bigarren taldeetan jokatu zuen, 2017-2018 denboraldian lehen taldeko eskubide osoko jokalari bihurtu arte.

Lesioa gaindituta, prest

Iazko denboraldian sei partidatan besterik ez zuen jokatu, eskuin orkatila bihurritu zuen arte. «Aurtengoa gogorra» izan dela adierazi du Marta Pereak: «Min hartu nuen zelaian gustora nengoenean eta minutuak jokatzen nituenean. Hasiera batean, bazirudien hilabete edo denbora gutxiko kontua izango zela, baina, azkenean, luzatu egin zen».

Galdakaoko erdilariak adierazi du datorren urtean pentsatzen ari dela, eta bere «unerik onenera» itzuli nahi duela.