Murrizketen amaiera eta normaltasunera buelta Arrigorriagako kiroldegian

Arrigorriagako Udala | Eusko Jaurlaritzak atzo, otsailak 14, iragarritako osasun-murrizketa gehienen amaierarekin, tokiko erakundeek aurre egin behar diote orain udal-instalazioen erabilera-arauak berregokitzeko eta berrantolatzeko erronkari.

Hala egin du Arrigorriagako Udalak udal kiroldegiarekin. Pandemiaren aurreko erabilera arauak eta erabiltzaileek egungo arauei buruz duten iritzia baloratu ondoren, normaltasunera itzultzea erabaki du, hobekuntzaren bat tartean dela.

Hauek dira aurreikusten diren aldaketak: muskulazio-gimnasioan aurretiko hitzordua kenduko da eta edukiera normaltasunera itzuliko da. Ikastaroetan gehienez 10 pertsonako taldeak egiteko araua kendu egin da eta, beraz, edukiera ere normaltasunera itzuliko da; hala ere, maskara erabiltzea derrigorrezkoa da barnealdean. Igerilekuari dagokionez, erabiltzaile bakoitzeko gehieneko denbora 40 minututik ordubetera luzatuko da (lehen bezala), baina aurretiko hitzordua mantendu egingo da, erabiltzaileek oso modu positiboan baloratu baitute plaza erreserbatzeko aukera. Aldageletako edukiera % 100ekoa izango da; eta kluben kasuan, bakoitzak erabakiko du kideek aldagelak erabiliko dituzten ala ez.

Eñaut Barandiaran Gardentasun, Partaidetza, Komunikazio eta Kirol zinegotziak azaldu duenez, “pandemiak iraun duen bitartean araudia kudeatzea eta aplikatzea erronka handia izan da Udalarentzat. Helburua elkar zaintzeko baliabideak jartzea izan da eta oso zorrotzak izan gara. Horrek ahalegin handia eskatu digu bai guri bai herritar guztiei. Ahal den neurrian kiroldegiaren erabileran arauak malgutzea albiste ona da Arrigorriagarentzat”.