Udalekuetarako izen ematea apirilaren 10ean irekiko da

Galdakaoko Udala | 4 eta 11 urte bitarteko haurrek (2013ko urtarrilaren 1etik 2020ko abenduaren 31ra bitartean jaiotakoek) aisialdiaz eta euskaraz lagunartean gozatzeko aukera izango dute, berriro, uztaileko goizetan. Galdakaoko Udalak 560 plaza eskainiko ditu guztira herriko udalekuetan, hiru lekutan banatuta: Aperribai, Urreta eta Gandasegi.

Izen ematea apirilaren 10ean, asteazkena, irekiko da eta hilaren 21era arte egongo da zabalik. Plazak izen emate dataren hurrenkeraren arabera onartuko dira, eta lehentasuna izango dute gure udalerrian erroldatuta dauden haurrek.

Gurasoei lana eta familiaren zaintza bateragarri egitea errazteko asmoz, aurten ere jantoki zerbitzurako aukera egongo da uztaileko udalekuetan, eta haurrak utzi eta jasotzeko ordutegi malgua izango da. Beraz, ordutegi osoa 08:30etik 15:30era luzatzeko aukera izango da.

Haurrek hiru txandatan eman ahal izango dute izena: lehena uztailaren 1etik 12ra izango da, bigarrena uztailaren 15etik 26ra, eta aldi osoa uztailaren 1etik 26ra arte. Izen emateak telematikoki egin beharko dira www.galdakao.eus webgunean. Nolanahi ere, laguntza behar izanez gero, hitzordua eskatu ahal izango da Galdakaoko Udaleko Euskara Arloaren telefonora deituta (944010540).

GALDAKAOKO HIRI UDALEKUAK