Bueltan dira Madalenak Arrigorriagan!

Arrigorriagako udaleko nota | Bi urte dira jaiak ohi legez ospatu ezin direla Arrigorriagan. Izan ere, COVID-19ak eragindako egoerak zuhurtzia eskatzen zuen eta horrela jardun zuen udal gobernuak: kulturaren aldeko apustua eginda baina formatuak egokitzearen erronkari erantzunez. Aurtengo 2022 honetan, eta kontuan hartuta pandemiaren eragina nabarmen jaitsi dela, Jai Batzordeak eta Udalak aurtengoei ilusio handiz helduko dietela adierazi dute.

Erabaki honi eutsiz, uztailaren 21etik 25era burutuko diren Madalenen egitaraua eta programazioa elkarrekin marrazteko lehenengo asanblada deitu dute martxoaren 31n, osteguna, 19:00etan Edurne Garitazelaia kultur etxean.

Jai Batzordeak eta Udalak herritar guztiak animatu dituzte asanbladan parte hartzera. Ideia berriak batu, jarduerak proposatu eta herritar guztiekin batera jaiei ikuspegi berezitik begiratzeko helburua dute.

Maite Ibarra Arrigorriagako alkateak zera azaldu du: “Madalenak data bereziak dira edozein arrigorriagarrentzat. Herritar eta elkarteek urteak daramatzate jai herrikoien inguruan lanean, herri bezala batzen gaituzten guztiak erdigunean jarriz. Kaleetan topatzeko eta espazioak konpartitzeko aukera paregabea. Ilusio handia dugu elkarrekin kulturaz beteriko jaiak antolatzeko. Geure aldetik, ditugun baliabide guztiak jarriko ditugu”.