Antzerkiaren barrunbeak ezagutzeko aukera izango dute herritarrek Galdakaon, doan

Galdakaoko Udala | Nolakoa da antzoki bat barrutik? Zer dago teloien atzealdean? Non janzten, aldatzen dira artistak? Zenbat langile aritzen dira ikuskizun bat prestatzen? Zer egiten du bakoitzak? Torrezabal antzokiko ateak parez pare zabaldu, eta bertako txoko ezkutuak zein arte eszenikoen eraikuntza barrutik ezagutzeko aukera izango da Galdakaon. Asteazkenean abiatuko da Antzerkiaren Barrunbeak egitasmoa, arte eszenikoekiko interesa duen edonorentzako tailer sorta. Antzerkia Agerian bisita antzeztua martxoaren 26an eta 27an egingo da.

Herriko antzokia herritarren eskura jartzea da bi proiektuen helburu nagusietako bat; Torrezabal ezagutu eta norberea sentitzea. Beste helburu nagusia, arte eszenikoen konplexutasuna ulertzea, kulturaz eta kriterioz jantzitako herritarrak sortzea. Doakoak izango dira bi jarduerak.
 

ANTZERKIAREN BARRUNBEAK:

“Obra baten atzean zer dagoen baldin badakigu gehiago disfrutatuko dugu lan horretaz, eta adibidez antzerki bat berez gustatu ez arren, horretaz ere gozatu ahal izango da”, azaldu du Pako Revueltas aktore eta zuzendari galdakoztarrak tailerren xedea. Revueltas bera izango da tailerrak gidatuko dituena.

“Ikusleentzako tailerra da, ez antzerkia egiten ikasteko tailerra”, nabarmendu du Revueltasek ekimenaren aurkezpenean. Topaketa dinamiko eta informalak izango dira nagusi; hitzaldiak egingo dira, solasaldiak Torrezabalera datozen artistekin, eta bisitak beste sormen gune batzuetara. Produkziorako lekuak erakutsiko dira, eta ikuskizun bat posible egiten duten mota askotako profesionalen lana ezagutzeko aukera izango da. “Tailer hauetan parte hartzeko ez da ezer jakin behar”, azaldu du dinamizatzaile arituko den aktore galdakoztarrak bertaratzeko gonbita egiteko; “ikuskizun eszeniko baten atzean ezkutatzen dena aurkitzeko jakinmina duen edonorentzako tailerra da”. 

Asteazken honetan izango da lehen saioa, eta hamabostero egingo dira tailerrak, guztira, zazpi. Tailer guztiak diferenteak izango dira, eta guztietan parte hartu ahal izango da, edo solte batzuetan ere bai, nahi izan ezkero. “Topaketa lasai, dinamiko eta informalak izango dira, eta amaieran seguraski ardo bat hartuko dugula elkarrekin”, adierazi du Revueltak. 

19:30etik 21:00era bitartekoak izango dira saioak, egun eta gai hauekin:
? Otsailak 9: Zenbat gauza ikusten ditugu antzerki lan batean?
? Otsailak 23: Torrezabaleko antzokia bisitatzea. Nolakoa da agertoki bat barrutik?
? Martxoak 9: Lanbideak sorkuntza eszeniko baten barruan.
? Martxoak 23: Interpretazioa. Mota desberdinak: antzerkia eta ikus-entzunezkoak.
? Apirilak 6: Zuzendaritza eszenikoa.
? Apirilak 20: Bilboko antzoki batera bisita.
? Maiatzak 4: Bilboko Harrobia ekoizpen zentrora bisita abian den sorkuntza lan bat ikusteko, eta elkarrizketa sormen taldearekin.

ANTZERKIA AGERIAN:

Antzerkiaren aurpegi ezezaguna ezagutzeko aukera bat da, baita Torrezabal Kultur Etxeko txokoak eta lanbide eszenikoaren sekretuetako batzuk ezagutzekoa ere. Fokuak, mikrofonoak, efektu bereziak eta interpretazioaren magiaz gozatzeko aukera izango da. GANSO&Cía konpainia arduratuko da umorezko bisita antzeztua egiteaz. 

Martxoaren 27a Antzerkiaren Nazioarteko Eguna dela baliatuta, ingurumari horretan egingo dira bisitak, Katrin Schlegel programatzaileak azaldu duenez. Doakoak izango dira bisitak, baina gonbidapenak jaso beharko dira aurrez, martxoaren 1etik aurrera, Torrezabaleko txarteldegian edo Udalaren webgunean. Honakoak dira bisita antzeztuen datak:

? Martxoak 26: 

• 11:00etan eta 12:30ean, euskaraz
• 17:00etan eta 19:00etan, gazteleraz

? Martxoak 27:

• 11:00etan eta 12:30ean, gazteleraz
• 17:00etan eta 19:00etan, euskaraz

Antzerkia eta Torrezabal herritarrengana gerturatzeko beste urrats bat dira bi jardunak. Olaia Parra Kultura zinegotziak azaldu duenez, herrira ekartzen diren antzerkien inguruko iritzia ere jasotzen hasi da Udala, programazioa etxe guztietara bidaltzen hasi da, eta zenbait lanen ondoren protagonista eta herritarren arteko solasaldiak ere egingo dira. 

Guzti horrekin, bere Gobernu Planaren 79. neurria betetzen ari da udal gobernua: Antzerkiaren barrunbeak ikusarazten.