Emakume anitzak eta paregabeak bat eginda: berdintasuna helburu

Arrigorriagako Udala | Lelo honekin hasiko du Arrigorriagako Udalak martxoak 8ko kanpaina (Emakumeen Nazioarteko Eguna). Helburua emakumeen aniztasunaz kontzientziatzea da, bakoitzak dituen premia, ezaugarri eta kezka zehatzak kontuan izanik.

Udal Politika Feminista sailak eta udalerriko hainbat eragilek, gaia jorratzeko hainbat ekimen antolatu dituzte. Antolatutako programazio hau martxoaren 3an hasi eta apirilaren 3ra arte luzatuko da.

Joana Etxeberria, Gizarte Ekintza eta Politika Feministako zinegotziak azaldu duenez, «eskubide-eta aukera-berdintasunaz hitz egiten dugunean, arraza zuriko eta klase ertaineko emakumeen ingurunetik eta premietatik begiratzeko joera dugu. Garrantzitsua da, beraz, jabetzea nora eta nondik begiratzen dugun, eta horrela, kultura, egoera eta ezaugarri pertsonal ugariei arreta jarriko diogu».

Maite Ibarrak, Arrigorriagako alkateak, gehitu du: “Berdintasunaren bidean aurrera egitea guztion kontua da. Horretarako, elkar topatzea eta hitz egitea beharrezkoa da. Eta hori da antolatu dugun egitarauan helburua; emakumeok egunero bizi ditugun diskriminazio-egoeren inguruan kontzientzia hartzea”.

Antolatutako egitarauaren jarduerez gain, Udalak eta udalerriko merkatarien elkarteak (ADECKA) elkarrekin bideo bat egin dute udalerriko emakume merkatari eta ostalarien lana ikusarazteko.