Arrigorriagako lehen emakumeen etxea diseinatzeko prozesu parte-hartzaileak lehen urratsak eman ditu

Arrigorriagako Udala | Udalak Arrigorriagako lehen emakumeen etxea diseinatzeko prozesu parte-hartzailea jarri du martxan, udalerriko ahalik eta emakume gehienen iritziak jaso eta, elkarrekin, zer nolako etxea nahi duten hausnartu, eztabaidatu eta erabakitzeko helburuarekin.

Prozesuari aurreko ostiralean, apirilaren 1ean, eman zioten hasiera eta 51 emakumek hartu zuten parte.

Saioari hasiera emateko, Joana Etxeberria Politika Feministako zinegotziak, proiektuaren sorrera bultzatu duten Arrigorriagako mugimendu feministaren mugarriak balorean jarri zituen, baita proiektua gauzatzeko Berdintasun Kontseiluak orain arte eman dituen urratsak ere. Ostean, etxearen planoa jaso eta hau bisitatu zuten. 

Bukatzeko, hausnarketa-dinamikari ekin zioten, eta taldeka antolatuta, hainbat gairen inguruan aritu ziren: zer espero duten emakumeen etxetik, zer balio eta printzipio eraiki behar diren bertan, zer espazio eta jarduera eskaini beharko lituzkeen eta zer premia ase behar dituen.

Gainera, bilkuran parte hartu zutenek inkesta bete zuten. Asanbladan parte hartzeko aukera izan ez zutenentzat, inkesta udaleko web orrian bete ahalko dute apirilaren 10era arte (https://labur.eus/rZ15V) edo udal eraikinetan galdetegia zuzenean bete.

Lehenengo bilkuraren arrakasta ikusita, bigarrenaren data adostu zuten: apirilaren 29an, 18:30ean.
Joana Etxeberriak Gizarte Ekintza eta Politika Feminista zinegotziak zera azaldu du: “Oso hunkigarria izan da adin desberdineko emakumeak parte hartzeko prest daudela ikustea. Belaunaldien arteko topagunea bilakatu da espazioa eta aniztasun horrek elkarrekin ikasi eta sortzeko aukera asko emango dizkigu”.