Apirilaren 27tik 30era izango da udaberriko Sormene

Galdakaoko Udala | Sormeneren udaberriko edizioaren nondik norakoen berri eman dute gaur antolatzaileek, Muguru plazan egin den agerraldian. Euterpe duoaren musikaz lagunduta, “Zaindu maite duzun hori” leloaren azpian azaldu dute udaberriko edizioa, Sormeneren talde aholkulariko hainbat kidek. Hain zuzen, euskal kulturgintzaren zaintza izango da laugarren aldiaren oinarria.

Udaberri honetako edizioan inoiz baino galdakoztar gehiagok hartuko du parte sortzaile gisa; tailerretan arituko diren ikasleak aintzat hartuta, 200 galdakoztar baino gehiago ariko da sormen lanetan. Gainera, errepikatuko ez diren emanaldiak prestatu dira, emanaldi bakanak izango dira, beren beregi Sormenerako sortutakoak. 

Dantzaren nazioarteko egunean (apirilak 29), era askotako dantzek hartuko dituzte Galdakaoko kaleak, bertsoekin eta musikarekin batera. Kulturgintzaren komunitatean bizitzeko aldarri bat izango da.

Honakoa da egitaraua:

– Apirilak 20, osteguna: Sormene aurkeztuko zaie galdakoztarrei eta Zizpa gazte konpartsari buruzko “Iratxoa behar genuen” dokumentala aurkeztuko da 19:00etan, Torrezabal Kultur Etxean. Udaberriko Sormeneren edukiak eta egitaraua aurkezteaz gain, Galdakaoko bi gazte sortzailek, Aitzol Zamalloak eta Xabi Ealok, Galdakaoko Zizpa gazte konpartsari buruz sortu duten dokumentala aurkeztuko da, “Zizparen ibilbidearen errepasoa da; herrian erreferenteak bilatzetik erreferente izatera nola pasa den ikusiko da”, adierazi du Xabi Ealo sortzaileetako batek. Dokumentala galdakoztarrei buruz galdakoztarrek sortutakoa da. 

– Apirilak 27, osteguna: Goizean ikasleentzako tailerrak izango dira ikus-entzunezkoen inguruan. Josi Sierra galdakoztar zinemagileak Sormeneri buruzko laburmetraiak zelan grabatu eta editatu erakusten dihardu ikastetxeetan, BideoSormene atalean. Sierrak adierazi duenez, “egunero erabiltzen duten teknologia modu sortzailean erabiltzeko deia egin nahi diegu gazteei”. Tailerrak ikasleei bideratuta egon arren, edonork hartu ahal izango du parte BideoSormenen.

Ostegun arratsaldean elkarrekin arituko dira kultur adierazpide askotako sortzaileak, Bapateko Sormene atalean; gehienak, galdakoztarrak izango dira. Bat-batean sortutako ikuskizunean parte hartuko dute Alfonso Medina, Aratxo Angulo, Beñat Armentia, Gaizka Chamizo, Garazi Arrese, Ione Ibarretxe, Karlos Aretxabaleta Txapel, Marijose Bayon, Naroa Larriba, Nerea Larrazabal eta Shakti Olaizola sortzaileek. 19:00etan izango da, Torrezabal Kultur Etxean. 

–  Apirilak 28, ostirala: Goizean ikasleentzako arte plastikoen tailerra izango da eta horma irudi ibiltaria egingo dute Santi Brouard plazan, Karmele Gorroño galdakoztar artista plastikoarekin batera. Kartoizko kutxekin osatutako horma irudia margotuko dute ikasleek. 
Arratsaldean, Oihana antzezlana antzeztuko da Atx teatroa, El Punto Gunea eta Itzuli konpainien eskutik, 19:00etan Torrezabal Kultur Etxean.

–  Apirilak 29, larunbata: Sormene Ibiltaria. 30 minutuko emanaldiak izango dira, Galdakaoko leku ezberdinetan eskainiko direnak. 

• 18:30ean Urretan: Galdakaoko Akëer musika taldearen emanaldia.
• 19:15ean Iturrondon: Galdakaoko Divenire dantza eskolakoen dantza erakustaldia.
• 20:00etan, Someran, bertso-saioa: Balkoitik balkoira. Paula Amilburu eta Josune Aramendi.
• 20:45ean, Santi Brouard plazan, emakume rap kantariak: Fani, Herbas, Marta eta La Basu. Galdakaoko Andra Mari dantza taldeko musikariak lagun, leku batetik bestera kalejira izango da. 
• 21:30ean, dantza ikuskizuna: Bertikala eta zorua elkarlanean. Taupada dantza eskolak eskainiko du ikuskizuna Torrezabal kultur etxearen horma batean. “Dantza zorutik atera eta horman jarriko dugu”, adierazi dute Taupada dantza eskolako kideek. 

–  Apirilak 30, igandea: BideoSormene rallyean aurkeztuko diren laburmetraien proiekzioa eta sari banaketa. 18:00etan Torrezabal Kultur Etxean.

Sormeneren lau lan ildoetatik (sormena, plazak, komunikazioa eta transmisioa) 2021eta 2022ko edizioetan transmisioan sakontzea erabaki zen. 2022ko udazkenean, transmisioa ildoaren barruan, amatasuna, sorkuntza eta euskara jorratu ziren, eta aurten, zaintza hartu dute gogoetagai eta sormenerako pizgarri. “Gure jardunean, zaintzak bizirautea esan nahi du.

Zaindu euskarazko kulturgintza bizi dadin. Zaindu gure sortzaileak eta euren lana euskarazko kulturgintza eta euskara bizi daitezen. Gure jardunean euskarazko kulturgintzaren historia eta oraina transmititzea zaintza da. Gure jardunean euskaraz sortzeko grina transmititzea zaintza da”, adierazi du Gotzon Barandiaranek, Sormeneren zuzendari artistikoak. 

SORMENE EGITARUA